17-nji aprelde Türkmenistanyň inžener-tehniki we ulag kommunikasiýalary institutynyň guramagynda ýurdumyzyň ýokary okuw mekdeplerinde bilim alýan talyplaryň arasynda “Arkadag şäherinde hereket edýän elektromobillere kuwwat beriji bekediň innowasion taslamasy” atly Hakaton bäsleşigi geçiriler. Bäsleşigiň esasy maksady talyp ýaşlaryň döredijilik başarnyklaryny ýüze çykarmaga mümkinçilik berýän gurşawy emele getirmäge gönükdirilendir. Bu Hakaton bäsleşiginiň aýratyn ähmiýetli tarapy dürli hünär başarnyklaryny özleşdirýän talyplaryň bir ýere jemlenip, hödürlenýän meselelere özleriniň garaýyşlary boýunça adaty bolmadyk, täsin çözgütleri tapmaga ýykgyn etmeklikleridir.  

Hakaton bäsleşigi ýaşlaryň tebigy, takyk, inženerçilik we tehniki ylymlary içgin öwrenmeklerine, dürli ugurlarda sanly ulgamy ornaşdyrmagyň programma üpjünçiligini hem-de emeli aňyň önümlerini döretmäge höwesini we ylmy döredijilik ukyplaryny artdyrmaga kömek eder.

Bäsleşik eminler toparynyň kesgitlän ýumuşyny 3 sagadyň dowamynda ýerine ýetirmek arkaly geçirilýär. Oňa her ýokary okuw mekdebinden düzümi 5-den köp bolmadyk talyplaryň 2 sany topary gatnaşyp biler. Ýerine ýetiren işlerine baha berlip, netije çykarylanda pikirleriň ýerlikliligi, özboluşlylygy, täzeligi we kreatiwligi, olaryň amaly ähmiýeti we toparlaýyn işiň netijeligi göz öňünde tutulýar.

Uzukjemal DURDYÝEWA,
Türkmenistanyň Döwlet energetika
institutynyň talyby.