«Türkmennebit» döwlet konserniniň «Nebitgazçykaryş» trestiniň «Körpeje» gaz çykaryş müdirliginde geçen üç aýda hereket edýän guýulardan alnan «mawy ýangyjyň» möçberi 772 million kub metrden hem geçip, meýilnama 113 göterime barabar ýerine ýetirildi. Şunda artyk çykarylan «mawy ýangyjyň» möçberi 86 million kubmetrden hem köp boldy.

Çärýek asyra golaý wagt bäri hereket edýän bu müdirlik günbatar Türkmenistanyň çäklerindäki «Körpeje», «Çekişler», «Altyguýy» ýaly ýataklarda hereket edýän guýulardan «mawy ýangyjy» çykarmak, taýýarlamak we ony sarp edijilere ugratmak işini birkemsiz ýola goýmagy başarýar.

«Körpeje» gaz çykaryş müdirliginiň hünärmenleri hasabat döwründe guýulardan alynýan gaz kondensatynyň hasabyna 12 müň 420 tonna nebit tabşyrmak baradaky meýilnamalaryny hem 117 göterim berjaý etmegiň hötdesinden geldiler.