Ahal welaýatynyň kitaphanalarynyň döwrebap hyzmatlaryndan peýdalanýanlaryň sany artýar. Şu ýylyň ýanwar — aprel aýlarynda welaýatyň kitaphanalaryna täze ýazylan raýatlaryň sany müňe golaýlap, hasapda duran okyjylaryň umumy sany 100 müň 200-den geçdi.

Agzalan döwürde okyjylar tarapyndan dürli mazmunly kitaplaryň 35 müňden gowragy, şol sanda syýasy neşirleriň 5 müňden, çeper eserleriň 11 müňden, çagalar edebiýatlarynyň 10 müňden, beýleki neşirleriň 7 müň 500-den gowragy okamak üçin alyndy. Bitewi elektron kitaphana ulgamynyň hyzmatyndan peýdalanyjylaryň sany hem artdy. Geçen dört aýda welaýatyň kitaphanalarynyň, şol sanda etraplaryň merkezi kitaphanalarynyň işgärleri tarapyndan elektron kataloga salnan kitaplaryň sany 1 müň 300-den geçdi. Şol döwürde welaýatyň kitaphanalaryna «Galkynyş» kitap merkezinden neşirleriň müňlerçesiniň tapgyrlaýyn gelip gowuşmagy bilen, olaryň kitap gaznalary has-da baýlaşdy.