Türkmenistanyň Prezidenti Serdar Berdimuhamedow Ahal welaýatyna iş saparyny amala aşyryp, Ahal welaýatynyň täze, döwrebap edara ediş merkeziniň gurluşygynda alnyp barylýan işler bilen tanyşdy hem-de bu ýerde Ministrler Kabinetiniň göçme mejlisini geçirdi.

Häzirki wagtda 2019-njy ýylda gurluşygyna badalga berlen Ahal welaýatynyň täze, döwrebap edara ediş merkeziniň gurluşygyň 1-nji tapgyrynda işler tamamlaýjy tapgyrda alnyp barylýar. Ony şu ýylyň dekabr aýynda ulanmaga bermek meýilleşdirilýär. Döwlet Baştutanymyz binalaryň enjamlaşdyrylyşyna, olaryň ýanaşyk ýerleriniň abadanlaşdyrylyşyna yzygiderli gözegçilik etmegiň möhümdigini belledi hem-de bu babatda döwlet komitetiniň ýolbaşçysyna birnäçe anyk tabşyryklary berdi.