Şu günler Ak bugdaý etrabyndaky umumybilim berýän orta mekdeplerde «Sagdyn durmuş — bagtyýar geljek» ady bilen wagyz-nesihat duşuşyklary geçirilýär. Ýörite meýilnama esasynda geçirilýän bu duşuşyklar Türkmenistanyň Zenanlar birleşiginiň etrap bölümi, etrabyň beýleki jemgyýetçilik guramalary, etrap bilim bölümi hem-de etrap polisiýa bölümi tarapyndan bilelikde guralýar.

Etrapdaky 3-nji, 11-nji, 19-njy, 21-nji orta mekdeplerde bolan duşuşyklar has-da täsirli boldy. Ýokary synp mekdep okuwçylarynyň we ýaş mugallymlaryň gatnaşmagynda bolan duşuşyklaryň barşynda bilimleri çuňňur özleşdirmegiň, asylly ýol-ýörelgelere, sagdyn durmuş kadalaryna eýermegiň, sport bilen meşgullanmagyň ähmiýeti dogrusynda aýratyn durlup geçildi. Onda çykyş edenler ýaşlara watansöýüjilik, asyllylyk, ahlak arassalygy bilen bagly gymmatly öwütlerini aýtdylar.