Düýn Ak bugdaý etrabynyň çäginde Türkmen bedewiniň milli baýramynyň şanyna bagyşlanylyp uzak aralyga atly ýöriş bäsleşigi geçirildi. Atly ýöriş bäsleşigini Ahal welaýat häkimligi hem-de «Türkmen atlary» döwlet birleşigi bilelikde gurady.

Bäsleşigiň badalga bermek üçin niýetlenilen ýörite taýýarlanan meýdançasy ir säherden toý ruhuna beslendi. Badalga berilýän ýerde meşhur estrada aýdymçylaryň, ussat bagşylaryň, tans we halk döredijilik toparlarynyň joşgunly çykyşlary ýaňlandy.

Bäsleşige ulyýaşar saýlama bedewleriň 20-si goşulyp, iki tapgyrda özara güýç synanyşdylar. Her tapgyr 30 kilometrden ybarat boldy. Uzak aralyga geçmek boýunça geçen nobatdaky atly ýöriş bäsleşigi ahalteke bedewleriniň çydamlylygyny, ýyndamlygyny kesgitlemekde örän ähmiýetli boldy.