Ak bugdaý etrabynyň Gämi oba Medeniýet öýünde, Türkmenistanyň Prezidentiniň «Türkmeniň Altyn asyry» atly bäsleşiginiň çäginde ýurdumyzyň bagşy-sazandalarynyň arasynda yglan edilen «Çalsana, bagşy!» atly bäsleşigiň etrap tapgyry geçirildi. Bäsleşigiň bu tapgyryny etrap medeniýet bölümi gurady.

Bäsleşigiň dowamynda milli saz gurallaryny, dutar ýasamak senetçiligine degişli esbaplary we beýleki milli gymmatlyklary öz içine alýan sergi guraldy. Bagşy-sazandalar degişli şertlere laýyklykda, türkmen halk aýdym-sazlaryny, mukamçy kompozitorlaryň döreden eserlerini ýerine ýetirmekde özleriniň zehin-başarnygyny görkezdiler.

Bäsleşigiň etrap tapgyrynda Magtymguly oba Medeniýet öýüniň çeper höwesjeňi Begmyrat Amanmyradow, etrabyň Çagalar sungat mekdebiniň mugallymy Çeşme Öwezgeldiýewa, Berkarar şäherçe Medeniýet öýüniň işgäri Nazar Nazarow dagy baýrakly birinji, ikinji, üçünji orunlara mynasyp boldular. Ýeňijilere hormat hatlarydyr ýadygärlik sowgatlar gowşuryldy.