Şu gün Türkmenistanyň Prezidenti Arkadag şäheriniň Gurbanguly Berdimuhamedow adyndaky çagalar sagaldyş-dikeldiş merkeziniň mejlisler zalynda Türkmenistanyň Ministrler Kabinetiniň giňişleýin göçme mejlisini geçirdi. Oňa degişli ýolbaşçy düzümler gatnaşdylar. Göçme mejlis Arkadag şäheriniň ikinji tapgyrynyň düýbiniň tutulmagy bilen bagly bolup, şu mynasybetli guralýan dabaranyň öňünçäsi bolup geçdi.

Soňra Serdar Berdimuhamedow Arkadag şäheriniň ikinji tapgyrynyň gurluşygynyň düýbüniň tutulyş dabarasyna gatnaşdy we ýörite taýýarlanan gutyny Arkadag şäheriniň ikinji tapgyrynyň gurluşygynyň binýadyna goýup, nobatdaky desgalarynyň gurluşyklaryna badalga berdi. 

Türkmenistanyň Prezidenti şäheriň ikinji tapgyrynyň düýbüniň tutulyş dabarasyndan soňra, Arkadag şäheriniň edara-kärhanalarynyň ýolbaşçylaryna dabaraly ýagdaýda täze awtoulaglary sowgat berdi.

Şeýle-de bu taryhy günde Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy baradaky kitap halkymyza sowgat edildi. Bu hem halkymyz barada edilýän taýsyz tagallalaryň nobatdaky subutnamasyna öwrüldi.