Aşgabatdaky Türkmenistanyň Söwda-senagat edarasynda “Türkmenistanyň nebiti we gazy — 2025” atly 30-njy halkara maslahat we sergi öz işine başlady. Bu ýylky maslahat “Halkara Parahatçylyk we Ynanyşmak ýylynda bütindünýä energetikanyň geljegini kemala getirmek – innowasiýalar, energetika geçişi we strategiki hyzmatdaşlyk” şygary bilen geçirilýär. Bu barada Türkmenistanyň resmi metbugaty habar berdi.

Maslahata ýurdumyzyň hem-de daşary ýurtlaryň iri nebitgaz kompaniýalarynyň ýolbaşçylary, döwlet we halkara guramalaryň wekilleri gatnaşýar. Onda energetika pudagyndaky täze tehnologiýalar, ekologik durnukly ösüş, metan zyňyndylaryny azaltmak, gazhimiýa önümçiligi we hyzmatdaşlygyň geljegi ýaly meseleler ara alnyp maslahatlaşylýar.

Maslahatyň çäklerinde 70 ýurtdan 100-den gowrak kompaniýanyň gatnaşmagynda “OGT Expo” sergisi hem guraldy. Sergä dünýä belli kompaniýalar — ADNOC, CNPC, “Eni” we PETRONAS ýaly nebitgaz ägirtleri gatnaşýarlar. Çäre 24-nji oktýabra çenli dowam eder.

Akmämmet Baýramow,

Türkmenistanyň Döwlet energetika institutynyň
mugallymy.