Golaýda, Türkmenbaşydaky nebiti gaýtadan işleýän zawodlar toplumynda täze, döwrebap önüm bolan «B-92» kysymly awiabenzin öndürilip başlandy. Synag döwründe tapgyrlaýyn amala aşyrylan takyk işleriň ählisi-de oňat netijelerini berdi.

Ol «Türkmenhowaýollary» agentliginiň awiabenzin baradaky ýüz tutmasy esasynda oba hojalyk pudagynda ekinleri mineral dökünler bilen üpjün etmekde, zyýanly mör-möjeklerden goramakda giňden ulanylýan «An-2» kysymly uçarlar üçin öndürildi.

Zawodlar toplumynyň ýokary oktanly benzin üçin goşundy öndürmek boýunça 4-nji sehiniň desgasynda tehnologik ýagdaýy sazlamak, kükürt kislotasynyň konsentrasiýasyny has ýokarlandyrmak maksady bilen geçirilen işleriň netijesinde täze awiabenzini öndürmek üçin degişli komponent alyndy.

Netijede zawodlar toplumynda kämil barlaglardan geçirilen täze «B-92» kysymly awiabenziniň döwrebap hil ülňelerine doly laýyk gelýändigi anyklanylyp «Türkmenstandartlary» baş döwlet gullugy tarapyndan sertifikatlaşdyryldy. Şeýlelikde häzirki wagtda sarp edijileriň arasynda täze önüme, awiabenzinine bolan islegler barha artýar.

Yslam TYLLANUROW,

Türkmen döwlet binagärlik we
gurluşyk institutynyň Inžener-mehanika
fakultetiniň dekany.