Golaýda, «Arkadag Serdarly bagtyýar ýaşlar» ýylynda bagtly çagalaryň arzuwlarynyň hasyl bolýan ýurdunda, çagalaryň tomusky dynç alyş möwsüminde wagtlaryny şadyýan we gyzykly geçirmeklerini, olaryň erkana ulalmaklaryny we rahat dynç almaklaryny gazanmak maksady bilen Türkmenistanda ýaşlar baradaky döwlet syýasatynyň 2021-2025-nji ýyllar üçin döwlet Maksatnamasyny amala aşyrmak boýunça ýerine ýetirilmeli çäreleriň meýilnamasyndan ugur alyp, Gökdere jülgesinde ýerleşýän «Bagtyýar nesiller» çagalar dynç alyş-sagaldyş merkezinde Ahal welaýat häkimliginiň, Türkmenistanyň Magtymguly adyndaky Ýaşlar guramasynyň Ahal welaýatynyň Geňeşiniň we Ahal welaýat bedenterbiýe we sport baradaky Baş müdirliginiň bilelikde guramagynda «Biz bagtyýar çagalar» atly medeni, sport çäresi geçirildi.

Merkeziň çägindäki sport desgalarynda we meýdançalarynda «Kim çalasyn, kim çakgan?!» ady bilen geçirilen türkmen milli oýunlary we köpçülikleýin sport çäreleri çagalaryň göwnüni açyp, olaryň wagtlarynyň hoş geçmegine uly itergi berdi. Ýaryşlarda tapawutlanan çagalara ýadygärlik sowgatlar gowşuryldy.