Bäherden etrabynda täze, 2023-2024-nji okuw ýylyna taýýarlykly barmak bilen baglanyşykly alnyp barylýan işleriň çäginde mekdepleriň arasynda yglan edilen bäsleşigiň jemi jemlendi. Bejeriş-abatlaýyş işlerini ýokary derejede alyp barmakda tapawutlanan mekdepleri ýüze çykarmak hem-de höweslendirmek maksady bilen geçirilen özboluşly bäsleşikde degişli görkezijilere aýratyn ähmiýet berildi.

Etrap bilim bölümi hem-de ylym we bilim işgärleriniň kärdeşler arkalaşygynyň etrap Geňeşi tarapyndan yglan edilen bäsleşigiň ýeňijilerini kesgitlemek üçin emin agzalary mekdeplerde bolup, bejeriş-abatlaýyş işleriniň geçirilişi, synp otaglarynyň döwrebap görkezme esbaplary bilen enjamlaşdyrylyşy bilen ýerinde tanyşdylar.

Bejeriş-abatlaýyş işlerini ilkinjileriň hatarynda, ýokary hil derejesinde ýerine ýetiren etrapdaky 16-njy, 2-nji orta mekdepleri ýeňiji boldular. Özboluşly bäsleşigiň ýeňijilerine ýörite sowgatlar gowşuryldy. Ýeri gelende, etrapdaky orta mekdepleriň 30-synda hem degişli işleriň göwnejaý ýerine ýetirilendigini bellemelidiris.