Bäherden etrabyndaky «Bäherden» tikin fabriginde şu ýylyň ýanwar — mart aýlarynda 2 million 81 müň manatdan gowrak önüm öndürildi. Şeýlelikde, meýilnama 102 göterim ýerine ýetirildi. Şol döwürde dürli görnüşli tikin önümleriniň hem 125 müňe golaýy öndürildi.

Kärhanada tikilýän ýöriteleşdirilen iş lybaslaryna, ýorganlara, düşeklere, ýassyklara we olaryň örtgülerine, beýleki tikin önümlerine isleg ýokary. Ýylyň başyndan bäri bu ýerde, esasan-da, ministrlikleriň, guramalaryň ýörite buýurmalary ýerine ýetirilip, olaryň sargydy boýunça taýýarlanan önümler öz wagtynda, bökdençsiz ugradyldy.

Ýeri gelende belläp geçsek, önümçilikde işleriň barha ilerlemeginde tikin önümleriniň hil derejesine we biçüwine aýratyn ähmiýet berýän işine ussat tikinçi gelin-gyzlaryň saldamly goşandynyň bardygyny bellemek gerek.