Türkmenistanyň Dokma senagaty ministrliginiň Bäherden etrabyndaky ýüplük fabriginde şu ýylyň ilkinji aýynda önüm öndürmek boýunça ýokary iş görkezijileri gazanyldy. Arkadag Serdarly bagtyýar ýaşlar ýylynyň ýanwar aýynda dokma senagatynyň bu öňdebaryjy kärhanasynyň işçi-hünärmenleriniň tutanýerli zähmeti netijesinde 7 million 907 müň 764 manatlyk önüm öndürildi. Munuň özi, geçen ýylyň degişli döwri bilen deňeşdirilende, önüm öndürmegiň ösüş depgininiň 101,8 göterim üpjün edilendigini aňladýar.

Ösüş-özgertmelere beslenen döwrümizde fabrikde öndürilýän dürli belgili ýüplükler dünýä bazarynda bäsdeşlige ukyplylygy, ýokary hilliligi bilen tapawutlanýar. Şeýle ýüplükleri öndürmekde guwandyryjy görkezijileriň gazanylmagynda fabrikde zähmet çekýän ýaşlaryň goşandy has-da saldamlydyr. Olar bu ýyly ýokary üstünliklere beslemek hyjuwy bilen zähmet gadamlaryny barha batlandyrýarlar.