Ýurdumyzyň çar künjeginde iri sport desgalarynyň we sport mekdepleriniň gurlup, ulanylmaga berilmegi islendik ýaşdaky ildeşlerimiz üçin sportuň dürli görnüşleri bilen meşgullanmaga giň ýol açyldy. Häzirki zaman ýaşaýyş toplumlarynda, döwrebap ýaşaýyş jaýlarynyň golaýynda futbol, woleýbol, basketbol meýdançalarynyň, tennis kortlarynyň gurulmagy ýaşlaryň we ýetginjekleriň sporta bolan söýgüsiniň ösmegine örän uly ýardam edýär. Soňky wagtlarda toparlaýyn oýnalýan sport görnüşleri bilen meşgullanýan ýaşlaryň sany günsaýyn artýar. Woleýbol boýunça ýurdumyzyň Ahal welaýatynyň Bäherden etrabynyň sport mekdebiniň “Galkynyş” topary hem şolaryň biridir. Bu toparyň düzüminde çykyş edýänler 2002-2004-nji ýyllarda doglan ýaş türgenlerimizdir. Ýaş türgenlerimiz Işangeldi Ataýew we Keramat Muhammedow dagylaryň tälimçilik etmeklerinde woleýbol oýnunda geçirilen ýaryşlarda birnäçe üstünlikleri gazandylar. Muňa mysal edip, 2002-2003-nji ýyllarda doglan ýaş türgenleriň arasynda 2017-2018-2019-2020-nji ýyllarda geçirilen woleýbol ýaryşynda Bäherden etrabynyň adyndan çykyş edip Ahal welaýatynyň 4 gezek çempiony bolmagy başardylar. Şeýle-de, 2003-2004-nji ýyllarda doglan türgenleriň arasynda 2019-2020-nji ýyllarda  woleýbol boýunça Bäherden etrabynyň birinjiligi ugrunda geçirilen ýaryşda 2 gezek çempion bolmagy başardylar.

         Mundan başga-da, 2020-nji ýylda Aşgabat şäherinde 2002-2003-nji ýyllarda doglan türgenleriň arasynda geçirilen Türkmenistanyň çempionatynda 3-nji orny eýelän Ahal welaýatynyň toparynyň düzüminde Galkynyş woleýbol toparynyň birnäçe oýunçylary çykyş etdiler.

Galkynyş woleýbol toparynyň düzümi Ýusup Sapardurdyýew, Nurgeldi Nurgeldiýew, Ýaýlym Saparow, Toýguly Söwütliýew, Reşit Poladow, Ýakup Berdiýew, Ybraýym Berdiýew, Toýguly Ýagşymyradow, Mekan Ataýew, Mahmyt Amanmyradow dagylardan ybarat.