Her öýüň bezegi, zynaty durky,
Güler ýüzli, çeper elli zenanlar.
Ýurdumyň daýanjy, dünýäniň örki,
Baýramyňyz gutly bolsun zenanlar! 

Dogrudanam, şahyryň bu setirlerinde zenanlaryň belent waspyny, olara goýulýan sarpany görmek bolýar. Bahar paslynyň gülleriň burk urýan ysynyň, tebigatyň janlanýan döwründe Halkara zenanlar güni baýram edilýär. Her bir ojagyň ýaraşygy, maşgalanyň sütüni, ahlak gözelliginiň nusgasy hökmünde sarpalanýan zenanlaryň, gelin-gyzlaryň mertebesini belentde tutmak halkymyzyň milli ýörelgesidir. Berkarar döwletimiziň täze eýýamynyň Galkynyşy döwründe ýurdumyzda Halkara zenanlar güni uludan bellenilip geçilýär. Ata Watanymyza wepaly, sagdyn we ruhubelent, bilimli nesilleri terbiýeläp ýetişdirmekde, ýurdumyzy ösüşlere beslemekde zenanlarymyzyň hyzmaty örän uludyr. Häzirki wagtda ahlak gözelliginiň ajaýyp nusgasyna öwrülen türkmen gelin-gyzlarymyza goýulýan sarpa ata-baba ýörelgelerimizden  gözbaş alýar. Güler ýüzli, mylaýym sözli, dilleri senaly mährem käbelerimiz, bahar gülleri ýaly owadan gelin-gyzlarymyz türkmeniň milliligini, asylly häsiýetlerini özünde jemleýär. Zenanlar ýöne ýerden owadan ýazlara deňelmeýär. Owadan bahar paslyna mahsus bolan ähli ajaýyplyklar olaryň häsiýetlerinde jemlenýär. Halkymyz enäni, zenany mukaddeslige deňeýän halkdyr. Ajaýyp keşdedir nagyşlar, nepis türkmen halysy, gülli keçeler gözelligiň, asyllylygyň, çeper elliligiň nusgasy bolan gelin-gyzlarymyzyň döredýän täsin sungaty bolup, dünýä ýüzüne ýaň salýar. Bu ajaýyp günde mährem zenanlarymyzyň waspy joşgunly aýdym-sazlaryň, çeper mazmunly goşgularyň üsti bilen ýetirilýär. Mähriban gelin-gyzlarymyzyň kalbyny şatlyk-joşguna besleýän bu çäreler olary ata Watanymyzyň ösüşine mynasyp goşant goşmaklyga ruhlandyrýar. Goý, güler ýüzli, şirin sözli mähriban enelerimiziň, zenanlarymyzyň mertebesi hemişe belent bolsun! Halkara Zenanlar güni gutly bolsun! 

Döwran BAÝRAMOW,

Türkmen oba hojalyk institutynyň talyby.