“Bedew-halkymyzyň uçar ganaty” ady bilen Ak bugdaý etrabynyň Gämi oba Medeniýet öýünde dabara geçirildi. Türkmen bedewiniň milli baýramyna bagyşlanan dabarany etrap häkimligi, etrabyň jemgyýetçilik guramalary hem-de etrap medeniýet bölümi bilelikde gurady.

     Dabara gatnaşyjylar medeni ojagyň eýwanynda guralan baýramçylyk sergisi bilen tanyşdylar. Etrap merkezi kitaphanasynyň göçme kitap sergisi, Milli “Ak bugdaý” muzeýiniň gymmatlyklarynyň sergisi, şeýle-de N.Saryýew adyndaky Çagalar sungat mekdebiniň şekillendiriş işleriniň sergisi uly gyzyklanma döretdi. Sergi gözellikde we ýyndamlykda deňi-taýy bolmadyk behişdi bedewlerimiziň beýanyna öwrüldi.

     Dabara aýdym-sazly çykyşlara utgaşdy. Etrabyň medeniýet bölüminiň medeniýet merkeziniň aýdym-saz, tans toparlarynyň şanly sene mynasybetli taýýarlan çykyşlary ýüreklere ylham berip, göwün göteriji täsirleri eçildi. Bedew bady bilen barha öňe barýan ata Watanymyzyň, ýurdumyzyň ösüşleriniň, döwlet Baştutanymyzyň döwletli tutumlarynyň, ahal-teke bedewleriniň waspy sungat çykyşlarynda eriş-argaç bolup geçdi.