Asyrlaryň dowamynda bedew türkmen halkynyň durmuşynda we medeniýetinde aýratyn orna eýe bolup, halkyň gaýduwsyzlygyny, sabyrlylygyny we öňe barýan ösüş ýoluny alamatlandyrdy.

Hut şu many-mazmun 2026-njy ýylyň «Garaşsyz, baky Bitarap Türkmenistan — bedew batly at-myradyň mekany» diýen şygarynda hem öz beýanyny tapýar. Bu şygar bedewiň milli buýsanç hökmünde eýeleýän ornuny görkezmek bilen bir hatarda, ýurdumyzyň ösüş ýolundaky ynamyny we öňe barýan depginini simwolik taýdan beýan edýär.

Türkmen bedewleri, ylmy taýdan Ahal-teke atlary diýlip atlandyrylýar we dünýäde iň gadymy at tohumlarynyň biri hasaplanylýar. Alymlaryň pikiriçe, bu tohumyň taryhy 3–5 müň ýyllyklardan gözbaş alýar. Bedewler Merkezi Aziýanyň gurak howa şertlerine uýgunlaşyp, ýokary çydamlylygy bilen tapawutlanýar.

Türkmen bedewleriniň esasy aýratynlygy — uzyn boýny, inçe süňk gurluşy, berk myşsa ulgamy we altynsow öwüşginli ýüňidir. Bu atlar diňe fiziki güýç bilen däl, eýsem akyllylygy we adama wepalylygy bilen hem tapawutlanýar. Bedew bir eýesine öwrenip, onuň bilen ruhy baglanyşyk döredýär. Ahal-teke bedewleri diňe bir milli miras däl, eýsem türkmen halkynyň ösüşe bolan ynamyny alamatlandyrýan gymmatlykdyr.

Aýbölek Kuwadowa,
Halkara senagatçylar we telekeçiler uniwersitetiniň talyby