Ýakynda Tejen etrabynyň Garryçyrla geňeşliginiň sport mekdebinde «Arkadag Serdarly bagtyýar ýaşlar» ýylynda «Saglyk» aýy mynasybetli Kärdeşler arkalaşyklarynyň Tejen etrap birleşmesiniň hem-de etrap bilim bölüminiň bilelikde gurnamagynda «Milli sport dünýäň bagty, sagdyn ruh äleme ýagty!»  atly şygar astynda etrabyň orta mekdepleriniň ýokary synp okuwçy oglanlarynyň arasynda sportuň futbol görnüşi boýunça bäsleşige badalga berildi. Ýaşlary sporta çekmek, olaryň berk bedenli, sagdyn, ruhubelent adamlar bolup ýetişmegini gazanmak, sporta höweslerini artdyrmak hem-de güýçlüleri ýüze çykarmak maksadyndan ugur alnan ýaryş diýseň çekeleşikli boldy.

Bu ýaryşda toparlar aýratynlykda bäsleşip, futbolçylaryň bu gezekki ýaryşda görkezen has gowy oýunlary janköýerleriň şowhunyna mynasyp boldy. Sportuň köpçülikleýinligini gazanmaga, ýurdumyzyň bagtyýar raýatlarynyň saglygyny goramakda okuwçylara sportuň ähmiýetini wagyz etmäge gönükdirilip geçirilýän bu ýaryşlar şu gezek hem diýseň gyzykly geçdi. Şeýlelikde bu bäsleşikde etrabyň 30-njy orta mekdebiniň ýygyndy topary ýeňiji boldular.

Bäsleşigiň ahyrynda ýurdumyzda sportuň ösdürilmegine uly üns berýän, köpçülikleýin sporty ösdürmek babatda uly tagallalary edýän Gahryman Arkadagymyzyň, Arkadagly Serdarymyzyň janlarynyň sag, il-ýurt bähbitli işleriniň hemişe rowaç bolmagyny arzuw etdiler hem-de ýeňiji bolan okuwçy ýaşlara bäsleşigi gurnaýjylar tarapyndan ýadygärlik sowgatlary, hormat hatlary dabaraly ýagdaýda gowşuryldy. 

Gurbanmyrat JUMAÝEW,

Türkmenistanyň Kärdeşler arkalaşyklarynyň 
Ahal welaýatynyň Tejen etrap 
birleşmesiniň işgäri.