Türkmenistanyň Inžener-tehniki we ulag kommunikasiýalary institutynda “Çyzuwly geometriýa we inžener grafikasy” dersi boýunça IV Halkara Açyk Internet olimpiadasy geçirildi. Bilim bäsleşigine dünýäniň 20-ä golaý döwletleriniň abraýly ýokary okuw mekdepleriniň talyplary gatnaşdylar.

Olimpiada Türkmenistanyň bilim ulgamyny döwrebaplaşdyrmak, tebigy we takyk ylmy ugurlary ösdürmek, şeýle hem sanly ykdysadyýetiň mümkinçiliklerini bilim ulgamyna giňden ornaşdyrmak boýunça alnyp barylýan döwlet syýasatynyň çäklerinde guraldy.

Halkara internet olimpiadasyna Hytaý, Russiýa, Gazagystan, Türkiýe, Belarus, Awstriýa, Azerbaýjan, Beýik Britaniýa, Hindistan, Italiýa, Singapur, Şweýsariýa, Özbegistan we beýleki döwletleriň talyplary gatnaşdylar. Bäsleşik şahsy hem-de toparlaýyn görnüşde geçirilip, gatnaşyjylar 180 minudyň dowamynda 10 sany meseläni çözmek boýunça öz bilimlerini we başarnyklaryny görkezdiler.

Çäräniň esasy maksady talyplaryň özbaşdak pikirlenmek ukybyny ösdürmek, ylmy sygymly meseleleri çözmekde tejribe toplamak hem-de zehinli ýaşlary ýüze çykarmakdan ybarat boldy. Şeýle hem olimpiada sanly maglumat-kommunikasiýa tehnologiýalarynyň mümkinçiliklerinden peýdalanyp, ýokary okuw mekdepleriniň we ylmy merkezleriň arasynda halkara hyzmatdaşlygy pugtalandyrmaga gönükdirildi.

Internet olimpiadasy türkmen, iňlis we rus dillerinde geçirilip, gatnaşyjylar ZOOM platformasy arkaly onlaýn görnüşde bäsleşdiler.

Çäräniň dowamynda mugallymlaryň we talyplaryň gatnaşmagynda “Altyn Asyr”, “Ýaşlyk” we “Türkmenistan” teleýaýlymlary üçin interwýular hem guraldy.

Türkmenistanyň Inžener-tehniki we ulag kommunikasiýalary institutynda geçirilen bu halkara bilim bäsleşigi ýaşlaryň intellektual mümkinçiliklerini ösdürmäge, olaryň ylma bolan gyzyklanmasyny ýokarlandyrmaga hem-de halkara bilim giňişligindäki hyzmatdaşlygy pugtalandyrmaga möhüm goşant boldy.

Çeşme: Türkmenistanyň Inžener-tehniki we ulag kommunikasiýalary instituty