Ahal welaýatynyň ähli ýerlerinde bolşy ýaly Tejen etrabynyň gallaçy-kärendeçileri hem däne oragyny guramaçylykly dowam etdirýärler. Orak mösümi etrap häkimliginiň ýörite taýýarlanylan iş meýilnamalary esasynda alnyp barylýar. Bu işe däne orujy kombaýynlarynyň täze gelip gowşan tapgyrlary hem gatnaşdyrylýar.

      Şu günki-gün däne oragynda toparlaýyn usulda gije-gündüziň dowamynda işler alnyp barylýar. Bu ugurda awtoulaglaryň ýygnan hasyly bökdeçsiz daşalmagyna iňňän uly ähmiýet berilýar. Ol awtoulaglaryň arasynda döwlet, hususy tehnikalaryň bardygy hem aýratyn bellenmäge mynasypdyr.

       Däne oragyna gatnaşyjylara medeni durmuş şertleriň göwnejaý ýola goýulmagy, tehnikalara hyzmatlaryň iş üstünde alnyp barylmagy zähmet öndürijiliginiň has hem ýokarlanmagyna ýardam edýär. Bu işde etrabyň jemgyýetçilik guramalaryna hem aýratyn orun degişli bolup durýar. Olar her 10 güniň dowamynda kärendeçileriň, sürüjileriň, kombaýynçylaryň arasynda guralan ýaryşyň jemleri jemleýärler we ýeňijileri iş üstünden sylaglaýarlar. Günortan arakesme wagtynda bolsa etrabyň medeniýet işgärleri tarapyndan zähmet adamlaryň armasy ýetirilýar.