2025-nji ýylyň 16-njy oktýabrynda Daşkent şäherindäki Mirzo Ulugbek adyndaky Özbegistanyň Milli uniwersitetinde “Magtymguly – dünýäniň akyldary we onuň pelsepesiniň häzirki döwürdäki ähmiýeti” atly halkara maslahat geçirildi. Bu çäre 2025-nji ýylyň “Halkara Parahatçylyk we ynanyşmak ýyly” diýlip yglan edilmeginiň çäklerinde geçirildi.

Maslahata Türkmenistanyň Özbegistandaky Ilçihanasy, Özbegistanyň degişli döwlet guramalarynyň wekilleri, Magtymgulyşynas alymlar, medeniýet işgärleri, ýokary okuw mekdepleriniň mugallymlary hem-de talyplar gatnaşdylar.

Türkmenistanyň Özbegistan Respublikasyndaky Ilçisi Ş.Meredow öz çykyşynda Magtymguly Pyragynyň parahatçylyk baradaky öňe süren garaýyşlary häzirki wagtda Türkmenistanyň daşary syýasy ýörelgeleriniň esasyny düzýändigini we bu barada Türkmenistanyň Prezidenti Serdar Berdimuhamedowyň “Magtymguly – dünýäniň akyldary” atly kitabynda giňişleýin beýan edilýändigini belledi.

Maslahatyň dowamynda çykyş edenler Magtymguly Pyragynyň döredijiliginiň diňe bir türkmen däl, eýsem dünýä edebiýatyna goşant goşýandygyny aýtdylar. Onuň ynsanperwerlik, agzybirlik we parahatçylyk baradaky şygyrlary häzirki wagtda hem uly ruhy gymmatlyk hökmünde kabul edilýär. Şeýle-de Magtymgulynyň mirasynyň türkmen-özbek gatnaşyklarynyň ösdürilmegine goşant goşýandygy nygtaldy.

Döwletmyrat GARRYÝEW,

Türkmenistanyň Döwlet energetika
institutynyň talyby.