Ylym-bilimiň gadyr-gymmatyny oňat bilýän eziz halkymyzda “Dil bilen dünýäni gezer” ýa-da “Bir dil bilen bir adam, iki dil bilen iki adam” ýaly örän ýerlikli atalar sözleri döredilipdir. Günsaýyn pajarlap ösýän berkarar döwletiň täze eýýamynyň Galkynyşy döwründe ýurdumyzda daşary ýurt dillerini öwrenmeklige bolan isleg barha artýar. Bu görkeziji esasan hem ýaşlaryň arasynda has-da ýokarydyr. Her bir medeniýetiň aýrylmaz bölegi bolan dil, islendik halkyň medeni-mirasynyň açary hökmünde hyzmat edýär. Dil öwrenmek halklaryň dostlukly, parahatçylykly gatnaşyklaryny berkitmekde, medeni-gumanitar hyzmatdaşlyklary ösdürmekde, giň gözýetime eýe bolmakda örän uly ähmiýete eýe bolup durýar.       

Häzirki wagtda ýaşlara daşary ýurt dillerini iň inçe aýratynlyklary bilen bile çuňlaşdyryp okatmaklyga döwlet derejesinde üns berilýär. Şeýle aladalaryň netijesinde ýaş hünärmenler islendik kärde zähmet çekseler-de, daşary ýurt dillerini suwara bilmekligi endik edinýärler.

“Türkmenistanda daşary ýurt dillerini okatmagy kämilleşdirmegiň Konsepsiýasyna” laýyklykda, dil öwretmek bilen bagly dünýä tejribesiniň gazananlaryny milli bilim ulgamyna ornaşdyrmak, bilimiň ähli derejelerinde bäsleşige ukyplylygy ýokarlandyrmak boýunça çäreleriň toplumy yzygiderli durmuşa geçirilýär.  

Bahar MUKUMOWA,
Türkmenistanyň Döwlet energetika
institutynyň talyby.