Ak bugdaý etrap häkimliginiň mejlisler jaýynda wagyz-nesihat häsiýetli maslahat geçirildi.  Welaýat Polisiýa müdirliginiň Ýangyn howpsuzlygy bölüminiň hem-de TMÝG-niň etrap Geňeşiniň bilelikde guramagynda bolan maslahatda gyş möwsüminde ýangyn howpsuzlyk düzgünlerini berjaý etmek boýunça gaýragoýulmasyz çäreleri wagyz-nesihat etmek maksat edinildi. Oňa jemgyýetçilik guramalarynyň wekilleri, dürli kärdäki raýatlar hem-de ýaşuly nesliň wekilleri gatnaşdy.

Maslahatda edilen bellenilişi ýaly, Gahryman Arkadagymyzyň taýsyz tagallasy bilen döwrebap ýaşaýyş jaýlary, şäherçedir obalar, önümçilik binalar gurulýar, ozal hereket edýän  desgalaryň durky döwrebaplaşdyrylýar hem-de ýokary derejede enjamlaşdyrylýar. Bu zatlar bagtyýar ildeşlerimiziň eşretli durmuşyň hözirini görüp, erkanalykda ýaşamagyna we zähmet çekmegine özboluşly itergi bolýar. Şeýle bagtyýar döwrümizde öýde-de, iş orunda-da ýangyn howpsuzlygynyň düzgünleriniň kadalaryna berk eýermek ählimiziň borjumyz bolup durýar.

Maslahata gatnaşyjylar raýatlaryň durmuşyň hözirini görüp, parahat we asuda  ýaşamagy ugrunda beýik işleri alyp barýan hormatly Prezidentimiziň döwletli tutumlarynyň rowaçlanmagyny arzuw etdiler.