Tylla saçlarymy «Güneşim» diýip,
Her agşam, her saba sypardyň, eje!
Kalbymy ýyladyp Gün nury deýin,
Men güneşi söýdüm hem seni, eje!

«Huwwa, huwwa, meniň gyzym Aý ýaly,
Allan, allan, balam, bahar-ýaz ýaly» —
Bu şirin sözleriň kalbymyň sazy,
Men hüwdiňi söýdüm hem seni, eje!

Her gün sowgat etsem elwan gülleri,
Güller bilen garşylaň siz günleri,
Siziň üçin ýygdym ter bägülleri,
Men gülleri söýdüm hem seni, eje!

Barlygyňda ýaza öwrülýär gyşlar,
Söýgiň ylhamyndan ýagar ýagyşlar,
Bahar gelse, sizi wasp eder guşlar,
Men bahary söýdüm hem seni, eje!