Ene, seniň goýnuň güneşli sähra, kalbyň kuýaşly asman mysaly. Meniň ähli duýgularymyň gözbaşy senden başlanýar.

* * *

Ene, seniň mähir-muhabbetiň näçe ganyp-ganyp içseň hem mädäňe degmeýän, hiç tükenmeýän bal suwly çeşmedir.

* * *

Ähli zada täsir edýän wagt saňa hökmüni ýöredip bilmeýär. Sen ähli ýaşda-da gözelsiň, mähriban enem!

* * *

Ýyllar meni tanalmaz derejede özgertdi. Emma men seni her gezek görenimde öňki bolşuma dolanýaryn, özümi ümbilmez çaga ýaly duýýaryn.

* * *

Ene, sen meniň adymy üýtgeşik labyz bilen, uly ähmiýet berip tutýarsyň. Men şundan hem seniň durmuşyňda nähili orun eýeleýändigimi aňýaryn.

* * *

Ene, seniň gollaryňda täsin gudrat bar. Diňe şol ellerde balalar rahat uklaýar.

Selbi DURDYÝEWA.