Gökdepe etrabynyň «Gala» toý mekanynda Çagalary goramagyň halkara güni mynasybetli baýramçylyk dabarasy geçirildi.

Dabara Gökdepe etrap häkimliginiň, Türkmenistanyň Gyzyl Ýarymaý Milli jemgyýetiniň Gökdepe etrap şahamçasynyň hem-de etrabyň jemgyýetçilik guramalarynyň bilelikde guramagynda geçirilip, oňa ýaş nesliň wekillerinden başga-da, dili senaly ýaşululardyr mährem eneler gatnaşdy.

Naz-nygmatly toý saçagynyň giňden bezelmeginde geçirilen dabarada halkara derejesinde bellenilýän ajaýyp sene mynasybetli gutlaglar aýdyldy, çagalara ýagşy arzuwlar beýan edildi. Aýdym-sazly çykyşlar şatlyga beslenen dabaranyň ruhubelentligini belende göterdi.

Dabaranyň dowamynda bagtyýar çagalara, şeýle-de ýaşuly nesliň wekillerine Türkmenistanyň Gyzyl Ýarymaý Milli jemgyýetiniň Gökdepe etrap şahamçasynyň baýramçylyk sowgatlary gowşuryldy.