Tejen etrabynyň “Tejen” daýhan birleşiginiň meýdan düşelgesinde günorta arakesmesi wagtynda aýdym-sazly medeni-dynç alyş dabarasy guraldy. Aýdym-sazly dabara, etrap häkimliginiň meýilnamasy esasynda etrap häkimliginiň, medeniýet bölüminiň hem-de jemgyýetçilik guramalarynyň bilelikde guramagynda geçirildi. Dabara galla oragyna gatnaşýan mehanizatorlar, sürüjiler we öňdebaryjy kärendeçiler gatnaşdy.

Tejen etrabynyň medeniýet bölüminiň aýdymçylarynyň, folklor hem-de tans toparlarynyň çykyşlary, wäşileriň degişme sahnalary meýdan düşelgesine ýygnananlaryň göwnüni göterdi we gyzgyn el çarpyşmalaryna mynasyp boldy. Aýdym-sazly medeni-dynç alyş dabarasynyň ahyrynda galla oragy möwsümine işjeň gatnaşýan mehanizatorlara, sürüjilere hem-de öňdebaryjy kärendeçilere etrabyň jemgyýetçilik guramalary tarapyndan ýadygärlik sowgatlar gowşuryldy.