Garaşsyz, Bitarap Watanymyzyň iň täze taryhy, gazanýan üstünliklerimiziň hem-de ösüşlerimiziň ählisi mukaddes Garaşsyzlygymyzdan gözbaş alýar. Taryh üçin gysga döwürde ata Watanymyz Türkmenistan ösüşiň demokratik ýoluna gyşarnyksyz eýerýändigini, dünýäniň ähli döwletleri bilen deňhukukly, dostlukly gatnaşyklara, iki tarapa-da bähbitli hyzmatdaşlyga ygrarlydygyny tassyklady. Garaşsyzlyk ýyllary içinde ýurdumyz kuwwatly we abadan döwlet hökmünde dünýädäki abraýyny has-da berkidip, halkara jemgyýetçiliginiň deňhukukly agzasyna öwrüldi.


1991-nji ýylda ýurdumyzyň öz Garaşsyzlygyny gazanmagy halkymyz üçin taryhy ähmiýetli waka boldy. Mähriban Watanymyzda täze eýýam başlandy. Taryhy ölçeg boýunça uzak bolmadyk döwrüň içinde Türkmenistanda döwlet we jemgyýetçilik gurluşy düýpli özgerdildi, giň gerimli durmuş-ykdysady özgertmeler amala aşyryldy we aşyrylýar.


Şu ýyl ata Watanymyz Garaşsyzlygynyň şanly 31 ýyllygyny dabaraly belleýär. Gojaman taryhyň gatlaryny külterlänimizde ujypsyz möhlet ýaly bolup görünýän Garaşsyzlyk ýyllary içinde döwletimizde amala aşyrylan işler, ýetilen sepgitler asyrlara barabar ölçegler bilen ölçenmäge mynasyp. Gadymy Jeýhun bilen gojaman Hazaryň aralygynda, Garagum sährasynyň goýnunda ýaýylyp ýatan türkmen topragynda ýaşaýan bagtyýar halkymyz Garaşsyzlygyň eçilýän miwelerini her ädimde görüp we duýup ýaşaýarlar. 
 

Ylýas ANNAMYRADOW,

Türkmen döwlet binagärlik-gurluşyk
institutynyň talyby.