Kaka etrabynyň Medeniýet öýünde «Gülüň owadan» atly bäsleşigiň etrap tapgyry geçirildi. Çeper elli, zähmetsöýer zenanlaryň arasynda yglan edilen bäsleşigiň bu tapgyry Türkmenistanyň Zenanlar birleşiginiň etrap bölümi, Türkmenistanyň Kärdeşler arkalaşyklarynyň etrap birleşmesi hem-de etrap medeniýet bölümi tarapyndan bilelikde guraldy. Bäsleşik şertleriň birnäçesinden ybarat boldy. Çeper elli zenanlar şol şertlere laýyklykda türkmen milli keçesini taýýarlamak bilen baglanyşykly işleri ýerine ýetirmekde, gadymy nagyşlary keçä salmakda, keçe bilen baglanyşykly rowaýatlary, gazallary, aýdyşyklary aýtmakda başarnygyny görkezdiler. Gyzykly we täsirli geçen bäsleşikde Maýagözel Nuryýewa birinji, Akjagül Möjekowa ikinji, Owadan Muhyýewa üçünji orna mynasyp boldy. Bäsleşigiň ýeňijilerine hem-de oňa gatnaşanlaryň ählisine Türkmenistanyň Kärdeşler arkalaşyklarynyň Kaka etrap birleşmesiniň gymmat bahaly sowgatlary gowşuryldy.

Türkmenistanyň Kärdeşler
arkalaşyklarynyň Kaka etrap
birleşmesiniň esasy hünärmeni: Akmuhammet Magtymgulyýew