Güýzlük däne ekilen meýdanlara ideg etmek işleri Ak bugdaý etrabynda agrotehnikanyň talaplaryna laýyklykda alnyp barylýar. Şu günler etrabyň ekerançylyk meýdanlarynda maýsalaryň kadaly boý alyp, bol hasyla beslenmegi ugrunda mynasyp tagallalar edilýär.

Maýsalary mineral dökünler bilen iýmitlendirmek, tagt we gögeriş suwlaryny tutmak, haşal otlara garşy göreşmek ýaly möhüm işlere jogapkärli çemeleşilýär. Bu ugurdaky çäreler etrabyň S.A.Nyýazow adyndaky daýhan birleşiginde, «Ak üzüm», «Üzümli toprak» daýhan hojalyklarynda has-da guramaçylykly ýola goýlupdyr. Şeýle bolansoň, agzalan hojalyklaryň ekin meýdanlaryna özboluşly görk we ýaraşyk berýän maýsalar göwnüňi göterýär. Etrabymyzyň jemgyýetçilik guramalarynyň wekilleri bolsa, oba zähmetkeşleriniň arasynda bolup, meýdan işlerini göwnejaý alyp barmak babatda olaryň armasyny ýetirip durýarlar.