Ýakyn günlerde paýtagtymyzda ýerleşýän Olimpiýa şäherçesinde Kuraş boýunça Dünýä çempionaty başlanar. Halkara kuraş assosiasiýasynyň ilkinji myhmanlary «Sport» we «Türgenler» myhmanhanalarynda ýerleşdirilip, olara milli däplerimize görä garşylamak üçin ýokary hilli hyzmatlar ýola goýuldy.

25-nji noýabrda Halkara kuraş assosiasiýasynyň kongresini we beýleki birnäçe çäreleri «Sport» myhmanhanasynda geçirmek meýileşdirilýär.

Halkara derejesindäki dünýä çempionatyna 50-den gowrak döwletinden türgenleriň 250 golaýy gatnaşar. Ýurdumyzdan wekilçilik edýän türgenleriň 15 sany bolup, olaryň  8 sanysy zenandygy bellärliklidir.

Ýurdumyzda geçiriljek Kuraş  boýunça XIV dünýä çempionaty türkmen türgenleri üçin jogapkärçilikli ýaryş bolman, eýsem ähli türkmen halkynyň myhmansöýerligini, medeniýetini, sport ulgamynda ýeten derejelerini dünýä ýüzüne äşgär etjek baýramçylykdyr.

Bu uly baýramçylyk mynasybetli paýtagtymyz Aşgabatda «Kuraş boýunça dünýä çempionatyna hoş geldiňiz!» diýen ýazgy ýerleşdirilip, özboluşly bezelen nyşanlardyr bannerler görkezilýär.

Juma Jumaýew,
Türkmenistanyň Telekommunikasiýalar
we informatika institutynyň
II ýyl talyby.