Berkarar döwletiň täze eýýamynyň Galkynyşy döwründe ýokary derejede üns-alada bilen gurşalan daýhanlarymyz «Halkyň Arkadagly zamanasy» ýylynyň Hasyl toýuny ýokary zähmet üstünlikleri bilen garşylap, ata Watanymyzyň ösüşlerine mynasyp goşant goşmak hem-de halkymyzyň bereketli saçaklarynyň bolçulygyny üpjün etmek ugrunda uly ruhubelentlik we yhlas bilen zähmet çekýärler.

Türkmen daýhanlarynyň tutanýerli zähmetiniň netijesinde bereketli topragymyzdan oba hojalyk ekinleriniň bol hasyly ýygnalýar. Hormatly Prezidentimiziň oba hojalyk pudagynyň binýadyny berkidip, babadaýhanlarymyz üçin döredýän şertleriniň we mümkinçilikleriniň netijesinde ýurdumyzda azyk bolçulygy has-da pugtalandyrylýar.

Berekediň baýramy bolan hasyl toýy rysgal-bereketliligimiziň, agzybirligimiziň, birek-birege hormat-sylagymyzyň äleme jar bolmasydyr. Bu toý parahat asmanyň astynda boldan öndürilýän naz-nygmatlaryň goňşy-golamy, ýakynu-daşy, dosty-ýary bir supranyň başyna jem edýändiginiň buşlukçysydyr.

Ýurdumyzda giňden bellenilýän hasyl toýy mynasybetli sagdyn, ruhubelent nesli terbiýeläp ýetişdirmek, köpçülikleýin bedenterbiýäni ösdürmek maksady bilen S.A.Nyýazow adyndaky Türkmen oba hojalyk uniwersitetiniň şeýle-de Aşgabat şäherindäki agrosenagat orta hünär okuw mekdebiniň talyp ýaşlarynyň arasynda dürli sport ýaryşlary geçirildi. Olarda ýaşlar öz erjelligini görkezdiler.

Goý, bizi täze zähmet ýeňişlerine ruhlandyrýan, egsilmez eşretleri peşgeş berýän Arkadagly Serdarymyz jany sag, ömri uzak, beýik işleri hemişe rowaç bolsun!

Hasyl toýy gutly-mübärek bolsun! 

Enegül TAŇYRBERDIÝEWA,

Aşgabat şäher agrosenagat
orta hünär okuw mekdebiniň
mugallymy.