Tebigy antibiotik hasaplanýan sarymsak özüniň birnäçe dermanlyk häsiýetleri bilen tapawutlanýar. Sarymsagyň özüne mahsus ýiti tagamyny we ysyny onuň düzümindäki efir ýagdaýlary emele getirýär. Hatda Lukman Hekim hem köp keselleri bejermekde sarymsak iýmegi maslahat beripdir. Ony gowrup iýseň, aşgazany berkidýändigini, suwuny içseň, sarygetirmäni hem dep edýändigini belläpdir. Sarymsak işdäni açýar, iýmit siňdiriş fermentleriň bölünip çykmagyny güýçlendirýär.

         Lukmanlaryň bellemegine görä, gan basyşy bilen bagly ýüze çykýan kesellerde we aterosklerozda hem sarymsak giňden ulanylýar. Sowuklamada, bronhial demgysmada sarymsagyň mesge bilen garylan şülä meňzeş garyndysy döşe çalynýar.

         Sarymsagyň düzümindäki kalsiý süňkleriň hem-de dişleriň sagdyn bolmagyny üpjün edýär. Şeýle-de onda köp mukdarda mikroblary we bakteriýalary gyryjy maddalar – fitonsidler bar. C, D, B, P toparlarynyň witaminleri bedeniň kesele garşy göreşijiligini berkidýär. Sarymsagyň dişjagazyny birnäçe minutlap çeýnemek agyz boşlugyndaky bakteriýalardan saplanmagyna ýardam edýär.

Lukmanlar ter sarymsagyň gyrgyçdan geçirilen melhemini hasanyň üstünde goýup, derä ýapmak bilen, bitmeýän ýaralary bejermekde peýda tapmagyň mümkindigini belleýärler. Çagalarda döreýän soguljanlary ýok etmekde sarymsagyň ergininden peýdalanmak netijeli usuldyr.