Halkara Bitaraplyk güni mynasybetli Kaka etrabynyň medeniýet öýünde “Bitaraplyk dillerimde dessanym, baýramyň mübärek Türkmenistanym” atly aýdym sazly baýramçylyk medeni çäresi geçirildi. Etrap häkimliginiň, etrabyň jemgyýetçilik guramalarynyň hem-de etrap medeniýet bölüminiň bilelikde guramagynda bolan dabara halk hojalygyň dürli pudaklarynyň öňdebaryjy işçi hünärmenleri, jemgyýetçilik guramalarynyň hem-de ýaşuly nesliň wekilleri gatnaşdy.

Baýramçylyk dabarasynda gutlag sözleri bilen çykyş edenler ýurdumyzyň halkara başlangyçlary barada aýdyp, Birleşen Milletler Guramasyna agza ýurtlaryň biragyzdan goldamagynda kabul edilen “Türkmenistanyň hemişelik bitaraplygy” atly Kararnamalaryň ähmiýetine ünsi çekdiler hem-de döwletimiziň halkara hukuk derejesiniň türkmene eçilen bagty dogrusynda uly buýsanç we guwanç bilen nygtadylar. Bagtyýar raýatlaryň ýürek joşduryjy sözleri toý zalyna ýygnananlarda ýakymly täsirleri galdyrdy. Dabara gatnaşyjylar halkymyzy baky bagtyýarlyga ýetiren, ýurdumyzyň halkara abraýyny belende göteren Gahryman Arkadagymyzyň, Arkadagly Gahryman Serdarymyzyň adyna alkyş sözlerini aýtdylar.

Şanly senä bagyşlanan dabaranyň dowamynda ýaňlanan milli we estrada aýdym-sazlar we tans çykyşlary aýratyn ruhy göteriliş alamatyny emele getirdi. Etrabyň medeniýet merkeziniň bagşy-sazandalarynyň, halk döredijilik toparlarynyň ussatlyk bilen ýerine ýetiren çykyşlarynda döwrümiziň buýsançly waspy öz beýanyny tapdy.

Aýgül Saryhanowa,
TKA-nyň Kaka etrap birleşmesiniň işgäri.