«Türkmenistan — ruhubelentligiň we sagdynlygyň ýurdy» atly XII  spartakiadanyň çägindäki ýaryşlar dowam edýär. Ak bugdaý etrabynyň sport mekdebinde agzalan spartakiadanyň çäginde kiçi futbol boýunça geçirilen ýaryş çekeleşikli boldy. Ony “Türkmenistan” Ýaşlar bedenterbiýe-sport guramasynyň welaýat bölümi hem-de welaýat sport we ýaşlar syýasaty Baş müdirligi bilelikde gurady.

     Ýaşlary köpçülikleýin sporta çekmek, olaryň sport ussatlyklaryny artdyrmak, güýçli toparlary ýüze çykarmak hem-de höweslendirmek maksady bilen geçirilen ýaryşa welaýatymyzyň başlangyç hünär okuw mekdepleriniň talyplaryndan düzülen toparlar gatnaşdy. Ýaryşda ýaş türgenler  ýeňiş gazanmak ugrunda ukyp-başarnygyny görkezdiler.

      Çekeleşikli we gyzykly geçen duşuşyklarda güýçli toparlar öňe saýlandy. Şeýlelikde welaýat häkimliginiň 6-njy başlangyç hünär okuw mekdebiniň topary birinji, 7-nji başlangyç hünär okuw mekdebiniň topary ikinji, welaýat ýörite sungat mekdebiniň talyplary üçünji orunlara mynasyp boldular. Ýeňiji toparlara “Türkmenistan” Ýaşlar bedenterbiýe-sport guramasynyň welaýat bölüminiň hormat hatlary gowşuryldy.