Babadaýhan etrabynyň medeniýet merkezinde geçirilen dabaraly maslahat TDP-niň etrap komiteti tarapyndan guraldy. Türkmenistanyň Halk Maslahatynyň II mejlisinden gelip çykýan wezipeleri ara alyp maslahatlaşmak, Türkmenistanyň Konstitusiýasyna üýtgetmeleri we goşmaçalary girizmek hem-de iki palataly saýlaw ulgamyna geçmek baradaky teklipleri işläp taýýarlamak boýunça “Konstitusion özgertmeler – döwrüň talaby” atly maslahata jemgyýetçilik guramalarynyň wekilleri, edara-kärhanalarynyň jogapkär işgärleri, işjeň agzalary hem-de ýaşuly nesliň wekilleri gatnaşdylar.

           Maslahaty TDP-niň etrap komitetiniň başlygy Şageldi Baýramow açyp, Türkmenistanyň Halk Maslahatynyň II mejlisinden gelip çykýan wezipeleri ara alyp maslahatlaşmak, Türkmenistanyň Konstitusiýasyna üýtgetmeleri we goşmaçalary girizmek hem-de iki palataly saýlaw ulgamyna geçmek baradaky teklipleri işläp taýýarlamak boýunça alnyp barylýan işler, Türkmenistanyň Halk Maslahatynyň nobatdaky mejlisinde şunuň bilen baglanyşykly kabul edilen çözgüdiň ähmiýeti barada gürrüň etdi.

           Maslahatyň barşynda  Türkmenistanyň Magtymguly adyndaky Ýaşlar guramasynyň Babadaýhan etrap Geňeşiniň başlygy Röwşen Hojageldiýew, Türkmenistanyň „Hormatly il ýaşulysy“, Babadaýhan etrabynyň Ak-wekil obasynyň ýaşaýjysy  Meretmuhammet Saparow dagy öz çykyşlarynda milli Liderimiziň Halk Maslahatynyň nobatdaky mejlisinde iki palataly saýlaw ulgamyna geçirmek baradaky başlangyjynyň taryhy ähmiýeti barada giňişleýin durup geçdiler. Olaryň nygtaýşy ýaly, Türkmenistanyň Konstitusiýasynyň kämilleşdirilmegi raýatlaryň hukuklaryny, azatlyklaryny, bähbitlerini durmuşa geçirmegiň ýörelgelerini açyp görkezýär, raýatlyk wezipelerini durmuşa geçirmäge ýardam berýär. Şu ajaýyp işleriň gözbaşynda bolsa Gahryman Arkadagymyzyň halkymyzyň bagtyýar durmuşda ýaşamagyny üpjün edýän bimöçber aladalary durandyr.