Kaka etrabyndaky «Abiwerd» taryhy-medeni döwlet goraghanasynyň hünärmenleri şu günler goraghananyň çäginde ýerleşýän Mäne baba kümmetinde berkidiş-rejeleýiş işlerini alyp barýarlar. Aşgabatdan 216 kilometr uzaklykda ýerleşýän, XI asyra degişli bolan bu kümmet iňňän ähmiýetli, özboluşlylygy bilen tapawutlanýan taryhy arhitektura ýadygärlikleriniň biridir. Bu bina ilkinji seljuk türkmen soltanlary Çagry beg hem-de Togrul beg tarapyndan Gündogaryň beýik akyldary, söz ussady, keramatly pir Abu Sagyt Abul Haýryň — Mäne babanyň gubrunyň üstünde gurlupdyr.

Goraghananyň rejeleýji hünärmenleri häzirki güýzki möwsümde türkmeniň şöhratly geçmişi hakynda gürrüň berýän bu taryhy ýadygärlikde alnyp barylýan berkidiş-rejeleýiş işleriniň hiline aýratyn ähmiýet berýärler. Çünki ýüzlerçe ýyllap gözel görkde durup, göreniň ünsüni özüne çekýän Mäne baba kümmeti halkymyzyň gymmatly mirasydyr, buýsanjydyr.