Adamlar jemgyýetiň aýrylmaz bir bölegidir. Olar hemişe biri-biri bilen aragatnaşykda ýaşaýarlar. Şol aragatnaşygyň hemişe sazlaşykda saklanmagy esasan dil, sözleýiş, has ýönekeý manyda aýdanymyzda gürrüňdeşlik arkaly amala aşyrylýar. Biz başga biri bilen gürleşen mahalymyz hiç bir psihologik täsir barada oýlanmaýarys, emma biziň aýtýan her bir sözümiz gürrüňdeşimizde aýratyn täsir galdyrýar.

Biz duýmaýan bolup bileris emma iki sany adamyň arasynda bolup geçýän gürrüňdeşligiň hem psihologiýasy bardyr. 

Gürrüňdeş bolmagyň psihologiýasy maşgalada hem uly rol oýnaýar. Her bir adama onuň maşgalasy galadyr. Ýöne şol galada her kim öz başyna ýaşasa birek-birek bilen içgin gürrüňdaş bolmasa, onuň peýdasy barmyka?
Elbetde maşgalanyň her bir agzasy öz gereklidigini duýmalydyr. Ýekeje ýakymly söz adamyň göwnüni galkyndyryp biler. Mysal üçin siz işden ýadaw geleniňizde ýakynlaryňyz size "Arma, biz seniň geleriňe garaşdyk" diýen badyna siziň ýadawlygyňyz ýatdan çykar. Siz hem öz gezegiňizde gowy söz aýdasyňyz geler.

Biri bilen gürrüňdeş bolmagyň düzgünleri bilen tanyşmak we endik etmek çagalykdan başlanýar. Ähli babatda bolşy ýaly, çaga köp zady maşgaladan öwrenýär. Şol maşgalada ulular çaý başynda birek – birek bilen mähirli gürrüňdeş bolsalar, bir-birlerini gyzyklandyrýan ýa-da biynjalyk edýän meseleler barada söhbetdeş bolsalar, çaga hem olardan gowy görelde alar, töweregindäkileri diňlemegi, olar bilen gürrüňdeş bolmagy öwrener.

Durmuşda duş gelýän kynçylyklara garamazdan, töweregiňizdäkiler bilen mylakatly, mährem gürleşmegi, ýakynlaryňyzyň, dost-ýarlaryňyzyň halyndan habar almagy unutmaň.

Jahan Saparowa,
Türkmen döwlet Maliýe 
institutynyň mugallymy.