2024-nji ýylyň 24-25-nji iýunynda Türkmenistanyň Bilim ministrligi tarapyndan mekdep okuwçylarynyň arasynda mental arifmetika boýunça bäsleşik geçiriler. Bäsleşik Magtymguly adyndaky Türkmen döwlet uniwersitetinde guralar. 

Bäsleşigiň jemleýji tapgyryna Türkmenistanyň dürli künjeklerinden saýlanan 110 sany zehinli 6-14 ýaşly okuwçy gatnaşar. Olar bäsleşigiň birinji gününde mental arifmetikanyň «Zehin senenamasyny hasaplamak», «Mental kwadrat kök (alty belgili) almak», «Ýatdan goşmak» we «Ýatdan köpeltmek (8x8)» görnüşleri boýunça başarnyklaryny görkezerler.

Bäsleşigiň ikinji gününde bolsa okuwçylar mental arifmetikanyň «Flash Anzan marafony» görnüşi boýunça ukyp-başarnyklaryny synaga goýarlar. Eminler topary bäsleşigiň jemlerini jemläp, ýeňijileri yglan eder. Ýeňijiler degişli diplomlar bilen sylaglanylar.