Änew şäherindäki  sport mekdebinde  Türkmenistanyň Kärdeşler arkalaşyklarynyň Milli merkezi tarapyndan yglan edilen Milli sport oýunlarynyň XXI spartakiadasynyň Ahal welaýat tapgyry geçirildi.  “Türkmenistan — Bitaraplygyň mekany” ýylynyň dabaralaryna baý öwüşgin goşan nobatdaky spartakiada özboluşly sport baýramçylygyna öwrüldi.  Oňa welaýatymyzyň şäherdir etraplaryndan ýerli tapgyrlarda ýeňiji bolan ildeşlerimiz gatnaşdy.

   Ýurdumyzda köpçülikleýin bedenterbiýäni, sport-sagaldyş hereketini ösdürmek, zähmetkeşleriň zyýanly endiklerden daşda durmagyny gazanmak we olary sporta köpçülikleýin çekmek, güýçli türgenleri welaýatyň sport toparlarynyň düzümine çekmek maksady bilen geçirilen ýaryşlar uly gyzyklanma eýe boldy. Degişli düzgünnama laýyklykda, giň göwrümli ýaryşlar  sportuň milli göreş, düzzüm, küşt we ýaglyga towusmak ýaly  görnüşlerini öz içine aldy.  

   Milli göreş görnüşi boýunça geçirilen tutluşyklar has-da çekeleşikli boldy. Welaýatyň dürli ýerinden gelen pälwanlar agram derejeleriň onusy boýunça güýç synanyşdylar.  48; 52; 57; 62; 68; 74; 82; 90; 100 kilogram agram derejelerinde, şeýle-de 100 kilogramdan ýokary agramda  geçirilen tutluşyklaryň netijesinde Ak bugdaý etrabynyň pälwanlary toparlaýyn hasapda birinji orny eýelemegi başardylar.

   Düzzüm boýunça geçirilen duşuşyklara her topardan  üç oýunçy gatnaşyp, onuň netijesinde erkekleriň arasynda Tejen etrabyndan  A.Garahanow birinji, Babadaýhan etrabyndan H.Hommyýew ikinji, şol etrapdan A.Hudaýnazarow üçünji, zenanlaryň arasynda G.Hydyrowa birinji, A.Ataýewa ikinji, B.Orazowa üçünji orna mynasyp boldular. Küşt ýaryşynyň netijesinde erkekleriň arasynda Gökdepe etrabyndan Ý.Baýramgeldiýew, Babadaýhan etrabyndan A.Atajaýew, Gökdepe etrabyndan T.Rejebow degişlilikde birinji, ikinji, üçünji orunlary eýelediler. Zenanlaryň arasynda bolsa, Bäherden etrabyndan Hurma Weliýewa birinji, Kaka etrabyndan Tawus Baýramsähedowa ikinji, Ak bugdaý etrabyndan Gözel Öwezowa üçünji orna mynasyp boldular. Ýaglyga towusmak ýaryşy hem gyzykly geçip, onda Gökdepe etrabyndan G.Kertikow, Tejen şäherinden A.Ýagşymyradow, Kaka etrabyndan G.Hallyýew dagy baýrakly orunlaryň eýesi boldular.

   Türkmenistanyň Kärdeşler arkalaşyklarynyň welaýat birleşmesi hem-de  welaýatyň sport we ýaşlar syýasaty Baş müdirligi tarapyndan ýokary guramaçylyk derejesinde geçen ýaryşlaryň ýeňijilerine  hormat hatlary, şeýle-de gymmat bahaly sowgatlar gowşuryldy.