Ynsany bezeýän ajaýyp häsiýetleriň biri onuň edebidir. Edep-ekram hakynda söz açanymyzda, ilki bilen, Aý ýüzli, şirin sözli zenanlarymyz göz öňüne gelýär. Türkmen zenanlarynyň ajaýyp keşbi asyrlarboýy halkymyzyň aýawly garaýan mukaddesligi bolup gelipdir. Olar taryhyň ähli döwürlerinde-de özleriniň asyllylygy, mähribanlygy, maşgalasyna wepalylygy, eliniň çeperligi bilen saýlanypdyrlar. Olar gerek ýerinde erkekler bilen deň durup, ata Watany, ene topragy, milletiň ar-namysyny goramakda gaýduwsyzlyk görkezipdirler.

Gyz maşgalanyň eliniň işli bolmagy durmuş zerurlygydyr. Aýal-gyzlar diňe keşdedir gaýma däl, islendik işe werziş bolmalydyr. Halkymyzda: «Aýal — öýüň binasy» diýlen bir aýtgy bar. Şunuň asyl manysy edep-terbiýäniň, göreldäniň gözbaşy bolan aýal maşgalanyň hojalygy bina ýaly dikleýändigi bilen baglydyr.

Edep-terbiýe babatynda geleňsizlige ýol berilmeli däldir. Maşgala mukaddes hasaplanýar. Şonuň üçin maşgalada önüp-ösen oglan we gyz perzentler şol mukaddeslige şek ýetirmeli däl, gaýta ojagyň abraý-mertebesini belende galdyrmaly. «Pylanyň gyzy, pylanyň ogly» diýip, özüni gowulykda tanatmagy başarmaly. Oglanlara «Il ogly bolup ýetiş», gyzlara bolsa “Abraýly gyz bolup ýetiş» diýilýändir. Ana, şeýle perzentler ene-atanyň buýsanjyna öwrülýär.

Gahryman Arkadagymyzyň «Enä tagzym — mukaddeslige tagzym» atly kitabynda «Türkmenistanda zenanlaryň jemgyýetde eýeleýän orny demokratiýanyň ählumumy ýörelgeleriniň halkymyzyň milli ruhy däpleri bilen sazlaşykly ösüşinde kemala gelýär» diýip belleýär. Döwlet tarapyndan döredilip berilýän giň mümkinçiliklerden peýdalanýan türkmen zenanlary dünýäniň okgunly ösýän döwründe asyrlaryň synagyndan geçip, durmuşda orun alan milli ýörelgeleri mynasyp dowam etdirýärler, döwrebap öwüşginler bilen ösdürip, geljekki nesillere miras goýmaga goşant goşýarlar.