Ata-babalarymyzyň galdyryp giden golýazmalaryna, taryhy gymmatlyklaryna, medeni mirasyna nazar aýlasaň, türkmen halkynyň geçmişde ençeme şöhratly döwletleri gurandygyna, öz mukaddesliklerini apalap saklandygyna göz ýetirýärsiň. Taryhyň syrly sahypalaryna näçe içgin aralaşdygyňça, ata Watanyň abadanlygy, il-günüň asudalygy üçin göreşen merdana gerçekleriň, ady älem içre ýaň salan şahsyýetleriň bolandygyna göz ýetirýärsiň. Diýmek, türkmen halkynyň öz geçmişine buýsanmaga ynamly gadamlar bilen öňe gitmäge doly haky bardyr.

Muzeý işgärleriniň uzak ýyllaryň dowamynda türkmen halkynyň milli mirasynyň gadymdan galan nusgalaryny il içinde toplap, muzeý gymmatlyklarynyň üstüni ýetirip durmakdaky gözlegli işleri, şol gymmatlyklaryň her biri dogrusynda geçirýän ylmy derňewleri geçmiş taryhymyzy, milli däp-dessurlarymyzy öwrenmekde örän ähmiýetlidir.

Milli gymmatlyklary toplamak, ylmy taýdan öwrenmek, olaryň takyk hasabyny ýöretmek hem-de geljekki nesle ýetirmek we dünýä ýaýmak muzeý işgärleriniň öňünde duran esasy wezipedir. Muzeýe barýan raýatlar hemişe täzeçilligiň gözlegindedirler. Şonuň üçin döredilen muzeýler ýa-da gurnalýan sergiler ýaşlaryň döredijilik işjeňliginiň höweslendirilmegine, milli mirasymyzyň öwrenilmegine we umuman, ruhy taýdan ösüşe hyzmat etmelidir.

Umuman aýdanymyzda, islendik halk üçin onuň gadymy geçmişinden galan gymmatlyklaryň goralmagy möhüm wezipedir. Geçmişden galan miras hazynasyny gazuw-agtaryş işlerinde tapýan arheologlarymyza, olary bejerip, arassalap, görer göze gelüwli şekile getirýän ussalarymyza alkyş aýdyp, ol tapyndylary muzeýlerde edil gözleriniň göreji ýaly saklaýan, ajaýyp geçmişlerine buýsanýan kämil muzeý işgärleri bilen agzybir işleýändigimize örän buýsanýarys. 

Enejan ASGAROWA,

Daşoguz welaýat Taryhy we ülkäni 
öwreniş muzeýiniň hünärmeni.