Türkmenistan Diýarymyzy durmuş-ykdysady taýdan ösdürmegiň aýdyň ýolunda milli ykdysadyýetimiziň ähli pudaklaryny, şol sanda obasenagat toplumyny düýpli döwrebaplaşdyrmak we köpugurly esasda ösdürmek boýunça özgertmeleriň uly tapgyryna badalga berilýär. Azyk bolçulygyny üpjün etmekde dünýäniň ösen tejribesiniň işjeň ornaşdyrylmagyna, pudakda halkara hyzmatdaşlygyň ösdürilmegine möhüm ähmiýet berilýär. Türkmenistan BMG-niň Azyk we oba hojalyk guramasy bilen obasenagat toplumyny durnukly ösdürmek, azyk howpsuzlygyny üpjün etmek we daşky gurşawy goramak ýaly ugurlarda ýola goýlan hyzmatdaşlygyny ösdürýär. Şunda obasenagat toplumynyň ähli kuwwatlyklaryny doly herekete girizmek, önüm öndürijilere goldaw bermek, azyk bolçulygyny üpjün etmek, ýokary hilli önümleriň önümçiligini artdyrmak, halkymyzyň durmuş derejesini ýokarlandyrmak boýunça toplumlaýyn çäreler amala aşyrylýar. Bu pudak senagat üçin zerur bolan çig mallaryň üpjünçiligini ýola goýýar, daşary ýurtlardan getirilýän harytlaryň ornuny tutýan önümçiligi ösdürmek we ykdysadyýetimiziň eksport mümkinçiliklerini artdyrmak boýunça milli maksatnamalaryň ýerine ýetirilmegine mynasyp goşant goşýar. Tebigy serişdeleri rejeli we netijeli peýdalanmagyň, ilat üçin amatly durmuş şertlerini döretmegiň hasabyna ykdysadyýetimiziň sazlaşykly ösüş depginini üpjün etmek döwletimiziň yzygiderli alyp barýan strategiýasynyň möhüm wezipeleriniň hatarynda kesgitlenildi. «Türkmenistanda 2019 — 2025-nji ýyllarda sanly ykdysadyýeti ösdürmegiň Konsepsiýasyna» laýyklykda oba hojalyk ulgamyny toplumlaýyn döwrebaplaşdyrmak hem-de diwersifikasiýa ýoly bilen ösdürmek boýunça öňde goýan wezipeler hem çalt depginlerde ýerine ýetirilýär. Häzirki wagtda sanly ulgamy ornaşdyrmak çäreleri ähli pudaklar bilen birlikde oba hojalyk pudagynda hem giňden ýaýbaňlandyrylýar. Şunuň bilen baglylykda, ýurdumyz dünýäniň iri kompaniýalary bilen ýakyn hyzmatdaşlyklary saklaýar. Ýakyn birnäçe ýylyň dowamynda döwletimiz tarapyndan satyn alynýan ýokary öndürijilikli ýörite tehnikalar telematik ulgam bilen üpjün edilen. Bu sanly ulgam oba hojalygynda geçirilýän işleri ýönekeýleşdirmäge, çaltlandyrmaga hem-de tehnikalaryň ýerleşýän ýerine, ýangyjyň sarp edilişine, ulanylýan wagtyna we beýleki ençeme ölçeglere merkezleşdirilen ýagdaýda internete çykyp bolýan islendik ýerden, hatda ykjam telefondan gözegçilik etmäge mümkinçilik berýär. 

Serdar HALOW,

Türkmen oba hojalyk institutynyň talyby.