Magtymguly Pyragy ajaýyp döredijilik mirasy bilen dünýä medeniýetiniň kämilleşmegine ägirt uly goşant goşan akyldar şahyrdyr. Türkmen halkynyň akyldar ogly Magtymguly Pyragy şygyrlarynda döwrüni, durmuşyň çarkandakly ýollaryny, arzuw-umytlaryny, söýgüni belentden wasp edipdir. Özboluşly şygyrlaryň her biriniň içinde Watansöýüjilik, gahrymançylyk, ynsanperwerlik ýaly adam ahlagynyň ýokary derejesindäki sypatlar eriş-argaç bolup geçýär. Magtymgulynyň edebi mekdebini okan her bir ynsan özüne gerekli bolan zady akyldaryň dürdäne setirleriniň içinden dür monjuk kimin tapyp bilýär.

Magtymguly Pyragy türkmen halkynyň durmuşynyň dürli taraplaryna giňişleýin ýüzlenipdir. Şolaryň arasynda halkymyzyň milli lybaslaryny, esasanam, gelin-gyzlaryň özboluşly nusgadaky al-gyzyl egin-eşiklerini ussatlyk bilen suratlandyrylýan şygyrlary bizi taryhyň jümmüşine alyp gidýär.

Asyrlaryň dowamynda kämilleşip, özüniň oňaýlylygy bilen durmuşa ornaşan milli lybaslarymyzyň durkunyň, gözelliginiň häzirki döwüre çenli saklanyp galmagy bolsa edeplilikden nyşan bolup durýar. 

Asyrlary aşyp, geljegi nurlandyrýan akyldar şahyryň edebi mirasy halkymyzyň genji hazynasydyr. Magtymguly Pyragynyň döredijiligini içgin öwrenmäge döredip berýän giň mümkinçilikleri üçin Gahryman Arkadagymyza, Arkadagly Gahryman Serdarymyza hoşallygymyz çäksizdir. 

Begenç ATAÝEW,
Türkmenistanyň Döwlet energetika institutynyň 
Sanly tehnologiýalar we kiberhowpsuzlyk fakultetiniň 
MH toparynyň 4-nji ýyl talyby.