Aşgabatda ekologiýa medeniýetini wagyz etmek we durnukly ösüş ýörelgelerini goldamak maksady bilen «Bilelikde ýaşyl geljege!» atly eko-festiwal geçirilmegi meýilleşdirilýär. Çäre «Ýaş tebigatçy» jemgyýetçilik guramasy tarapyndan guralar.

Eko-festiwal 2026-njy ýylyň 4-nji iýulynda sagat 16:00-dan 19:00-a çenli dowam eder. Guramaçylaryň taýýarlan maksatnamasyna laýyklykda janly aýdym-saz çykyşlary, çagalar we ulular üçin eko-oýunlar, STEM okuw meýdançalary, şeýle-de döredijilik ussatlyk sapaklaryny geçirmek göz öňünde tutulýar.

Çäräniň esasy maksatlary ekologik medeniýeti ösdürmek, daşky gurşawy goramak hem-de durnukly sarp ediş endiklerini wagyz etmekden ybaratdyr. Şol sebäpli-de gatnaşyjylardan özleri bilen gaýtadan işlenip bilinjek plastik çüýşeleri ýa-da başga adamlaryň peýdalanyp biläýjek köne egin-eşiklerini getirmek haýyş edilýär.

Festiwala işjeň gatnaşan myhmanlara «Ýaş tebigatçy» jemgyýetçilik guramasy we hemaýatkärler tarapyndan taýýarlanan ýadygärlik sowgatlar gowşurylar.

Eko-festiwal Aşgabat şäherindäki «Aşgabat» söwda-dynç alyş merkezinde guralýar.