18-nji iýunda paýtagtymyzda Türkmenistanyň Daşary işler ministriniň orunbasary Ahmet Gurbanowyň Slowakiýa Respublikasynyň Ykdysadyýet ministrliginiň Döwlet sekretary Wladimir Şimonýak hem-de Slowakiýa Respublikasynyň Türkmenistandaky Adatdan daşary we Doly ygtyýarly ilçisi Wiktor Boreski bilen duşuşygy boldy.

Onuň dowamynda taraplar hyzmatdaşlygyň möhüm ugurlaryny ara alyp maslahatlaşdylar. Şeýle-de Aşgabatda geçirilen Ykdysady hyzmatdaşlyk boýunça türkmen-slowak bilelikdäki toparynyň birinji mejlisiniň netijeleri boýunça pikir alşyldy. Toparyň işiniň söwda-ykdysady hyzmatdaşlygy giňeltmek we ileri tutulýan ugurlarda hyzmatdaşlygy ösdürmek üçin uly mümkinçilikleri döredýänligi nygtaldy.

Iki ýurduň döwlet edaralarynyň arasynda saparlaryň guralmagyny hem öz içine almak bilen syýasy dialogy mundan beýläk-de ilerletmäge we ýokary derejedäki gatnaşyklary işjeňleşdirmäge bolan başlangyçlara gyzyklanma bildirildi.

Galyberse-de, söwda-ykdysady hyzmatdaşlygyň ulag, energetika, maglumat tehnologiýalary we oba hojalygy hem-de beýleki ugurlar boýunça ösdürilmegi dogrusynda pikir alşyldy. Işewür toparlaryň arasyndaky gatnaşyklary işjeňleşdirmek, dürli saparlary guramak hem-de slowak kompaniýalarynyň Türkmenistanda geçirilýän sergilere we forumlara gatnaşmagy meselesine aýratyn üns çekildi.

Şeýle-de bilim we medeniýet edaralarynyň arasynda hyzmatdaşlygy giňeltmegiň mümkinçilikleri dogrusynda bellenilip geçildi.

Begnazar BEGNAZAROW,

Türkmenistanyň Daşary işler ministrliginiň
Halkara gatnaşyklary institutynyň talyby.