15-nji sentýabrdan 22-nji sentýabr aralygynda Russiýanyň “Sirius” federal çäklerinde açyk halkara astronomiýa olimpiadasy (OWAO-2024) geçiriler. Bu barada Russiýa Federasiýasynyň Türkmenistandaky ilçihanasy habar berdi.

Olimpiadanyň şertleri we tapgyrlary

 Olimpiadada 18 ýaşa çenli mekdep okuwçylaryndan ybarat toparlar gatnaşyp bilerler.
 Her ýurt 4-6 okuwçydan ybarat diňe bir topar bilen wekilçilik edip biler.
 Toparyň ýany bilen iki ýolbaşçy we iki synçy gatnaşyp biler.

 Olimpiada dört tapgyrdan ybarat bolar:

 Nazary tapgyr – teoriýa bilimlerini barlamak
 Amaly tapgyr – hasaplamalar we tejribe işleri
 Syn ediş tapgyr – astronomiki gözegçilik
 Blis-tapgyr – çalt jogaply testler

 Ýumuşlar iňlis dilinde berler, topar ýolbaşçylaryna we gatnaşyjylara zerur astronomiki adalgalaryň sözlügi hödürleniler.

Maliýe we guramaçylyk düzgünleri

 “Sirius” federal çäkleri toparlaryň ýaşaýyş we iýmit çykdajylaryny öz üstüne alýar.
 Synçylaryň gatnaşmagy guramaçylyk tölegleriniň hasabyna maliýeleşdirilýär.

Goşmaça medeni çäreler

Olimpiadanyň dowamynda oňa gatnaşyjylar üçin giň medeni maksatnama guralar. Oňa:

1.  Umumy okuw sapaklary
2.  Ussatlyk sapaklary
3.  Gezelençler giriziler.

Bellige alynmak

 OWAO-2024-e gatnaşmak isleýänler 10-njy awgusta çenli olimpiadanyň resmi web sahypasynda hasaba durmalydyrlar.

 OWAO – astronomiýanyň iň gowy däplerini birleşdirýän we dünýäniň dürli künjeklerinden zehinli ýaşlary jemleýän abraýly olimpiadalaryň biridir.

Olimpiada Russiýanyň Bilim ministrliginiň goldawy bilen, “Sirius” federal çäkleri hem-de “Zehin we üstünlik” gaznasy tarapyndan guralýar.