Şu günler Ahal welaýatynyň şäherdir etraplarynda, edara-kärhanalarda “Zähmeti goramak sagdyn we howpsuz iş şertleriniň girewidir” ady bilen okuw maslahatlary geçirilýär. Türkmenistanyň Kärdeşler arkalaşyklarynyň Milli merkeziniň tassyklan meýilnamasy esasynda guralýan okuw maslahatlara zähmetkeşler işjeň gatnaşýar. 

       “Türkmenistan — Bitaraplygyň mekany” ýylyna bagyşlanan okuw maslahatlaryň esasy maksady Türkmenistanyň Kärdeşler arkalaşyklarynyň Tertipnamalaýyn wezipelerini berjaý etmekden, jemgyýetde jebisligi pugtalandyrmakdan, zähmetkeşleriň arasynda sagdyn durmuşy wagyz etmekden hem-de täze özgertmeleriň durmuşa geçirilmegine işjeň gatnaşmakdan ybaratdyr. Şoňa görä-de, zähmet toparlarynda şu aýyň dowamynda geçilýän okuw maslahatlaryň barşynda Türkmenistanyň Kärdeşler arkalaşyklarynyň welaýat,  etrap-şäher birleşmeleriniň wekilleri edara-kärhanalaryň kärdeşler arkalaşygynyň ilkinji guramalarynda bolup,  olarda zähmeti goramak boýunça kadalary, düzgünleri berjaý etmek, şol sanda  guramaçylyk-tehniki, sanitariýa-arassaçylyk, bejeriş-öňüni alyş, dikeldiş we howpsuz zähmet şertlerini üpjün etmek, zähmeti goramak boýunça gollanmalaryň, gözükdirijileriň göwnejaý ýöredilişi, şeýle-de önümçilikde ýüze çykýan dürli hadysalaryň öňüni almak boýunça geçirilýän işler bilen tanyşýarlar.

      Kärdeşler arkalaşygynyň ilkinji guramalarynyň işiniň netijeliligini ýokarlandyrmakda möhüm ähmiýete eýe bolan okuw maslahatlaryň çäginde öňdebaryjy zähmet toparlary ýüze çykarylýar hem-de olaryň degişli hünärmenleri sylaglanylýar.