Sarahs etrabynyň ýüpekçi kärendeçileri şu ýyl 40 tonna çig pile taýýarlamagy maksat edinýärler. Häzirki wagtda etrabyň pile kabul ediş we guradyş kärhanasynda işler sazlaşykly alnyp barylýar. Kärhananyň hünärmenleri ýüpekçilerden gelýän çig piläni degişli talaplara laýyklykda kabul etmekde yhlasly zähmet çekýärler.

Türkmenistanyň Magtymguly adyndaky Ýaşlar guramasynyň etrap Geňeşiniň hem-de etrabyň beýleki jemgyýetçilik guramalarynyň wekilleri işleriň gyzgalaňly alnyp barylýan günlerinde ýüpekçileriň armasyny ýetirip, möwsümiň öňdebaryjylaryny höweslendirýärler. Tapawutlanýan ýüpekçileriň arasynda etrabyň S.Nyýazow adyndaky daýhan birleşiginiň zähmetkeşleri Kümüş Bäşimowany, Gözel Rejebowany, Güljahan Berdiýewany, Jumagözel Jumadurdyýewany agzamak gerek. Agzalan ýüpekçiler etrabyň jemgyýetçilik guramalarynyň hormat hatlaryna mynasyp boldular.